聖誕節之自省

今日係2016年既聖誕節，一如以往咁又係留左係屋企做我最鐘意做既野，就係打機睇戲上網同多左樣新既野-整魚。

魚係我今年九月先買，目的係想改自己既運氣。我因為聽左李居明既節目之後，知道自己係欠水，所以就決定養魚改運，希望對自己有利，由細缸養到而家大缸養紅龍。究竟有無明顯既轉變呢？我暫時感覺唔到，股票繼續轉輸，買馬同六合彩都無贏過。係咪要慢慢黎，等下呢？我真係唔知，不過養養下魚又覺得啲魚幾靚，如果要㨂一樣野黎養，我好可能會㨂猫，不過如果猫過左身我會好傷心，所以都係選擇養魚算。魚無得同自己互動，無左猫狗果種深厚感情。暫時黎講，依套魚缸同魚都係希望可以旺到風水既工具。黎緊仲會有一舊紫水晶洞會放係廳，一樣都係希望旺到自己。其實抽離咁睇，我係幾迷信同好相信依啲野。可惜暫時唔見到咩突破。

期權方面，兩個字-大敗。十一月既時候，個人輸到麻目左，買得好大注，一次過輸左六萬元。依啲錢係之前賺既，大部份都無用過，就咁放係股票度，但係股票一樣繼續輸，所以一野過將啲錢轉賬到期貨戶口，一炮過咁輸。而家諗番，其實我照舊放係正股度，唔郁佢當輸哂仲好，起馬唔係等錢使，放係正股做長線都無問題啦。不過當時好想賺番啲錢番黎，就去左博一鋪，依一鋪係輸哂！不過我都有信心可以追番，只要有一個浪我食到正，咁就可以回本再倒賺。

其實我係睇圖方面係有一定既技巧，只係對自己無信心，好多時都受到身邊既意見影響。我最唔想既就係報自己有咩倉俾人知，因為對方一知到你既倉之後，都會俾一啲無責任既意見你，而當你聽左依啲意見之後，你既睇圖眼光就會受到影響。講到尾都係對自己無信心。而家成日輸都無咩信心。我發現我自己係輸錢既時候唔會去睇股票書，只有係賺到錢時候先會再研究，其實係咪應該任何時候都要繼續去研究嗎？

年年既大時大節都係留係屋企，自己好似無咩朋友，認真咁諗，又真係無乜喎。興趣係打泰拳，識既都係HIBYE朋友，而番工同事都係。一來我自己將個心收埋，怕個心受傷，同其他無話題所以好怕同人出街。無話題怕DEADAIR導致唔想出街，唔想出街既時間長左，就算人地約自己都唔參與。久而久之就無人約，自己又好享受一個人既時光。

諗深一層，其實係我太自私，唔想同人分享自己既時光，所以到而家都係女朋友。唔敢約出街，好多段有機會既姻緣都流走左。其實見到身邊既人一個一個都搵到另一半都會羨慕，跟住又會同自己比下去，越覺自卑就越唔敢行出一步。時間一日一日咁樣過，我都唔識得點樣拍拖，點樣算好？

2017年要改變，我要俾自己一個目標，係五月三十一日之前識一個女朋友！

今日買左一條虎魚

其實依幾日都不停為魚缸加野減野。之前買左一條飛鳳魚，今日就買左一條細條既印尼虎。飛鳳魚無記錯係168元，而今日條印尼虎係40元。然後先後又減左五條魚，分別係兩條花豬，一條鸚鵡，一條羅漢同一條番王。依五條魚如果計買入價加埋應該要一百五十元，不過我為為左造番個養魚數做六條，同埋唔想其他魚去搶左啲糧食，所以我先決定放走果五條魚。
而家魚缸有八條魚，唔計兩條清道夫就有六條魚，合付風水數。果兩條清道夫都唔係差野，一條係白帆女王而另一條係星點琵琶，一黑一白。而另外六條魚就係一條鸚鵡，兩條金菠蘿，一條飛鳳，一條印尼虎同紅龍。紅龍印尼虎同飛鳳加埋一齊就係龍虎鳳，個名幾好聽而且各有優點特別飛鳳會食藻，有清道夫既功能，所以我好喜歡。而另外鸚鵡同金菠蘿係我一開始養魚果陣就養，算係陪住我學養魚，如果唔死都想一路養住。
其實最開頭養既係五條紅尾黑鯊，然後就係一對花豬同一條雪鯛。果陣雪鯛成日咬花豬，我唔識點解決就放左雪鯛入個樽度，跟依隔左一晚就死左，應該係嚇死。其實我果陣唔識養魚，原來魚係有性格。咁果對花豬原來為食，食左啲紅尾黑鯊仲同其他魚搶糧，又多屎。所以都有諗住唔養佢地。
現時果八條魚係最佳配搭，我應該唔使再換魚啦。而家要做既係保持水清同水質。我發現之前買既細菌屋係會甩好多渣出黎，搞到啲水好濁。如果要換會好煩，因為底缸其實已經積左部分渣，未必清得到，而且一郁啲細菌屋又會再甩渣。我諗要慢慢換，可以換左第二倉果啲細菌屋先，果度比效少支。不過一換又要使錢。而家用下用下我諗所有野加埋已經用左三萬元。
希望！好希望依套魚可以令我係股市度賺到大錢，俾我cover番個本先，有錢先可以繼續去換設備！魚應該唔會換了，慢慢長養。

紅龍到家第三天

今天是紅龍到我家的第三天，我已對紅龍是否掉眼或兜口的問題感到無所謂，反正我只想一條魚能健康生活下去，魚也不是拿去比賽或跟人比較，我養魚的目的只是風水因素。只要紅龍能發色便很有成功感了。

我的缸是混養，有花豬鸚鵡金菠蘿番王小羅漢，這些魚暫時和紅龍都相處得不錯，可是在餵食時出現了問題。每次餵蝦給紅龍都給其他魚先搶，紅龍好像沒有太大動機去搶食，其他魚食了蝦仁後，剩餘的蝦仁才會被紅龍食掉。這樣我的餵食成本便很高，因為其他魚都是餵魚糧，蝦其實只是給紅龍成，但現在是所有魚都搶成，變相紅龍食得很小。

我想要諗方法解決這問題。

買左一條紅龍

今日終於去左魚街莫義興買左一條紅龍，去莫義興之前，我去左幾間有賣龍魚既鋪頭，有啲最平要5500蚊，都有啲要3800蚊。其實我唔太識得分邊條好邊條差，我既預算係用5000蚊去買龍魚。咁啱我見到莫義興出post話今日會做優惠，所以拿拿臨上去莫義興買。
其實我琴晚都去左兩間樓上魚店睇過啲龍魚，大部分都係賣貴龍，唔啱我玩。之前我係莫義興買NEC龍魚燈果陣都睇過佢啲魚，覺得唔錯，所以今次上去莫義興買都同上次既好印像有關。
莫義興老闆介紹左啲紅龍俾我，其實我都唔知邊條係好，最後佢介紹左一條肥身既，有小小發色魚，不過有掉眼。其實我買完先覺得掉眼好似有啲唔好咁，不過又上網見到人話龍魚掉眼係必然既事，只係時間問題。如果係咁，掉眼都無法。他介紹另一缸龍魚俾我睇既缸，入面都有啲魚係發色，但係因為混養缸，所以啲魚都有甩魚鱗。針無兩頭利，又要無掉眼，又要出色，魚又要肥大又要無甩鱗，我諗要成萬銀。
作為新手既我，俾條無掉眼既魚我都可能養到掉眼，所以知足常樂。俾心去養而家條龍魚就好了。




新魚缸的第三天

第一天收到魚缸後，就迫不及待咁落鹽消毒魚缸。隔左一晚之後就倒左成缸水，不過倒之前發現到一個大問題，就係我只有水管加水入去，但係無工具去吸咁大缸既水出黎，而且低濾既快排我緊本用唔著。所以就要花左二百蚊買左一個抽水泵幫手，好彩個抽水泵幫到手抽哂成缸水出黎，雖然有啲慢因為個缸實在係大，但係如果無個泵我跟本唔會有氣力咁用手抽水出黎，依樣係我第一樣撞到既板。

用完個泵抽主缸水之後，就再抽底濾既水，好可惜個水泵係抽唔哂所有水，所以都要用毛巾去抹。抺既時候發現個魚缸手工麻麻，真係有無奈，依個缸要成萬蚊，我預其個缸既質素係幾好，但係點知有咁多小問題，例如缸底有啲玻璃膠跡，個魚缸玻璃都有花，依啲問題應該出缸時會檢查清楚同埋要避免啦，而家收左個魚缸唔通又話退咩？我本身都需要個缸去養魚。

我而家想養一條紅龍，加一兩條琵琶魚做清潔，但我本身有八條鯛魚，唔知點算好，上網放都唔知有無人要。如果將依八條魚同紅龍混養，我又怕紅龍會俾佢地咬。紅龍要成四五千蚊一條，如果買左紅龍既話，條龍先係主角。其實我有啲唔想養要果八條魚，但又無一埋由掉左佢地。依個係一個問題。

而第二個問題係個缸既背景係黑色，我根本唔知啲水清唔清，以前透明缸一睇就睇到啲水係咪濛，而家就睇唔清楚。我開燈之後係見到啲水好似有啲粉狀野，唔知養多幾日水啲粉狀野會唔會唔見。若然唔見左既話咁我就知黑底缸之下，點樣評估啲水係咪清。唔知而家放條龍入缸有無問題。

第三我而家有時間應該要去啲賣龍魚店睇下啲龍魚，一旦缸水養成左我就可以入魚去養，龍魚如果唔死可以養幾十年，所以要認真睇清楚，到時買左一條又要放就費時失事，始終你賣俾人咁貴，如果條魚養幾日死左都唔知關唔關我事。

昨日4呎魚缸送到了

4呎魚缸終於係22-11-2016送到。依個訂造魚缸要9600元，買埋其他配件都成5000千，再買埋龍魚就要2萬元埋單。真係好貴，但我心存風水魚缸既信諗，希望可以係股票市場賺番番黎!

昨晚送左魚缸上黎之後，駁好哂喉同線，開始加水同鹽去消毒，其間發生左件事，就係水太多溢左出黎，搞到木地板濕左，而個底缸板係通窿，所以我估有啲水積左係魚缸底，唔知會唔會整到發霉。個魚缸入埋水可能成噸重，我無可能搬開佢去抹，我諗如果要搬走個魚缸，可能係我搬屋果陣既事，所以到時可能會裝修，總知今次既錯失搞到好大鑊!

而家缸水都行左12個鐘到，今晚或者可以放水去抹缸。原來有好多野都無諗到或無想像中咁方便，好似換水咁，原來我無辦法放啲水出黎，所以今晚又要買個水泵去換水，如果搵到方法去換水，咁以後就方便好多。而家既情況係好似前路茫茫，見步行步，因為無人帶住，見到咩情況就解決咩情況。第二個問題係氣泵，我係淘寶買左個太大既氣石而家而家個泵又唔夠力推，所以浪費左。今晚要買埋個氣石同氣管。

第三就係棉，我仲未開始放生物環，未知會遇到咩情況，所以暫時唔知有咩要添置，我估係要買好似百潔布果啲野。

其實個缸好似整得麻麻，唔知係咪訂造就係咁，有一枝龍燈直頭唔夠位放，有啲驚訝!

百家樂

最近去過澳門，用左一千五百蚊本去玩百家樂，好好彩買三鋪，三鋪都中共贏左一千五百元。係一個DOUBLE。之後番到香港，就係淘寶買左幾本電子書，教投注百家樂。當中有兩本講既觀點比較深刻。

第一本：
建議一到賭場，去搵一張賭枱係有一條比較清晰既路，例如莊莊閒閒閒莊莊閒閒咁上下既路，然後只等每一條龍既第二局先落場。例如開緊之前講緊既路，咁如果下一鋪係開閒就唔好買住，等到有一鋪開莊，然後下一局就投注莊，換句話說唔好鋪鋪買，只買每一條龍既第二局。依個方法主張等。

第二本：
完全否定第一本書所講既等，因為依個作者討認百家樂係無路捉，唔應該等。只係要有一套好清晰既投注策略。例如當四鋪都會全中，咁依四鋪既注碼就係一一二三咁樣加注。作者認為係百家樂依種一賠一既賭局，只有加注才可以賺到錢，而並不是研究下一鋪開咩。

睇左依兩本書，的確開左眼界，原本賭錢係可以咁有策略。我好同意第二本書作者既睇法，一定係加注先可以賭到多啲既錢，令自己既賭本加大。佢既一一二三係當賺到錢先會加注，當你時來運到，加注都賺既時侯，咁你個賭本加大左，可以務既風險都加大。如果無連賺既話，就唔會加注。依個係十分好既方式。不過我都同意第一本書作者既建議。

我見到百家樂真係會出現一啲奇怪既局，出現一個有規律既賭局。如果跟第一本書既方法再配合第二本既投注策略，會唔會令自己既勝算大大提升呢？我感覺得到應該有幫助。或者試一試搵一日自己去澳門試下！

股票書

今日上網見到同事買左幾本股票書，依幾本股票書我係書局都睇過下，其中一本我仲買左。講真要成功係股市上賺到錢，依幾本書真係無用，只係講心理，好表面既野。如果連大市要升定要跌定係橫行都分唔到，只係講心法只係紙上談兵。

就好似一個習武之人，一味講氣功心法。當佢實戰時面對一個學三個月泰拳既人時，一定俾人打到飛起。原因係學泰拳既人實戰經驗豐富，相反只講心法既人，一到實戰就見真章，所有心法都用唔到。

股市就係一個咁現實既世界，第一件事如果唔知個走勢係點，所有講既心法一概無用。所以我要俾心機學好PRICE ACTION，有PRICE ACTION既底先好再去學心法。咁先係正途，如果一學就學心法就好快輸到無本。

養左一星期魚

今日星期二，已經養左魚一個星期。養魚真係好難，因為就憑肉眼係睇唔到缸水有無問題，只係見到清唔清。其實依個星期我買左幾種魚放入缸，都養唔到一日就死左，原因應該係水質唔適應。有點心灰，希望而家養既九條魚唔會再死啦。

諗番點解會養魚？係因為風水，而九條魚都算好既風水數目，我想養多兩條魚去到十一條，因為十一好似仲好，但係缸水唔俾我再加新魚，所以我諗都係唔好再行金魚街，唔好再買新魚啦，啲魚都唔平，平均四十蚊一條。其實我係為風水養魚，只要缸魚保持住九條，健康成長就可以，無須再搞咁多野啦。定期換水，每日餵糧就可以了。計埋計埋，唔計一開始開套缸既錢，買下買下都買左成五百蚊都有。

都幾浪費錢，仲未計電費果啲，所以都係脫毒唔好再沉迷買魚，好好地咁養住依九條魚先算。希望唔好再有魚升天啦，見住啲魚死都係幾灰。

買左一個24吋魚缸

前日29號，買左一個魚缸養魚。買依毎魚缸係因為風水，擺既位置，魚既顏色同數量都係有講究的。因為我希望風水可以加強我係股市既賺錢機會。不過暫時都未見成效，可能要再等一段時間吧。

養魚真係唔簡單，啲水仲係好濁，又唔想成日加化學劑令啲水變清。而家可能係魚缸既菌仲未形成一個生態圈吧。我已經準備好一桶水明天去換。我想係依度記底我養魚中遇到既問題同解決既方法。當係一種筆記。

真的很想能夠係股市獲取固定利潤

其實我認為係有方法可以係股市獲得固定利潤，但肯定不是每一次都能獲利。可以係股市中獲得利潤生活的人一定都在股市中輸過錢，但他們一定輸小賺多的。

一個成功的投資者，除左心理質素外，技術質素也要有水準。我覺得自己都下了心機去看股票書，看股票書不會令你立即賺到錢，但如果沒有看股票書，你對股市的認知及技術一定無法提升。有些技巧一定是透過傳受而得來的，沒有人告訊你一些技巧，你可能要行很長的路，犯了很多的錯才會汲取到經驗。

我真的很渴望能從股市中獲得勝利，很有這個慾望願景！

在這𥚃總結一下投資者要有的條件：
心理質素：要有止蝕止賺的決心。要冷靜觀察大市，等待機會入市出市，不要衝動。對自己的決定有信心，不要被小道消息動搖自己的信心和當初的決定。
技術質素：陰陽燭要熟悉，知道是轉勢還是順勢。對保力加通道有認識，知道在頂還是底。對即市盤路有認識，知道應在那個價位買入或賣出是最佳時機。

終於收到夾萬

今日收到上星期買既夾萬同係淘寶買既密碼鎖錢箱，希望放係屋企會有助增加自己既財運。

夾萬我放左係睡房床底下，依個位應該係西北方，夾萬入面放左五千元同一些用唔哂既外幣，借此將財運增加。而另一個錢箱則係將放係廳既零用錢及散紙放係入面，所以而家廳既零用錢位置好整潔，希望依個錢箱都會增加自己既財運。

中午既時候，我放好哂夾萬之後，試一試買左場波，雖然輸左，其實我都預左輸，不過唔緊要，只係小試牛刀。我另外買左今晚既六合彩，買左40元4注，看看會唔會有中奬。哈哈。

買夾萬

其實之前已經想係屋企放一個小夾萬，將我屋企既美金同日元都放入去夾萬。最理想係將我既港幣生活費都放進去。不過一直都無買到係因為個夾萬都唔平，要接近一千元，所以無買。

昨日聽到同事講李居明有提到係屋企既西北位放置一個夾萬可以有助財運，即刻令我想買一個夾萬番屋企。而家出面好大雨，等停雨後就去吉之島買一個小夾萬。

我琴間查過家既西北位係向住利豐方向，即是我瞓覺的位置。上網睇過關於財箱既文章，好似主要係放係睡房，所以我會選擇放係睡房西北位，係一個窗台位置。第二點係究竟個夾萬係放係床下底定係窗台位置呢？兩種說法都有，有話夾萬不可露眼。如果我放係床下底，咁個夾萬就唔會再開。因為開一次都要搬床，十分麻煩，無左用夾萬既意思。

同埋我唔會買兩個夾萬了，因為每一個夾萬都要放錢入去，如果買兩個就會分散左放入去既現金。其實我想個夾萬係實用既，我偏向放係窗台。買就一定會買，但係放邊就要夾一夾位置，真係不行既話就放床下底算了。

最終買左個轉盤夾萬，要1590元，有點貴，但我今天在期權賺了3200元，已經將2000元轉賬到東亞。

Whatsapp 網頁版

原來Whatsapp有網頁版，好方便，可以用鍵盤打字，方便我坐係電腦隔離既時候開住依個程式，一有野想打就可以直接係IMAC打。我諗Wechat都有，可以下載埋，咁iMac就方便好多，功能多左。

本身我諗住買個有數字既鍵盤。而家既藍芽鍵盤已經可以連接其他手提設備，不過如果啲溝通工具係有網頁版，咁藍芽接其他手提設備對我黎講係無用，因為本身係iMac已經可以用鍵盤。又可以慳番七百元。

其實iMac送果個鍵盤係好好打，我覺得打得好舒服。

好多同事升級了

今日知道好多我的同期都升級了，有不小係我以前拍過的。當中還有兩個是和我一起訓練的同學。

不知為何，見到這個升級人名表，心中有點不明的失落感。我自己是沒有考這次升級，其實誰能升和誰不能升都對我沒影響，但是看到這些人中有不小一起共事過，好似有點覺得自己很差。

說實在的，我非常抗拒再次入學堂。學堂那種生活方式和坐監沒兩樣，經常被罰被罵。我喜歡自由。再加上如果英文能力不能支持你做這工作，一定會做得非常辛苦。第一是你的同袍會看你不起，作為一個主任竟然不能說一口清楚的英文，那怎樣工作。第二是如果要帶隊，是要計劃行動，作為上級與下級的橋樑，是一個磨心。上不正下又歪，那你的傳達的訊息會很難被執行。

雖然上面所說的都是負面東西，但人工褔利真的很吸引。但我自己沒信心能做這工作，所以沒有去試。或許...或許有一天我會去試，但現在沒有心態去應付這工作。

心情屈悶

今日心情屈悶，自己情緒受到股市既影響很大。有好多野都無心機做，唔想做。好多野諗！

今日收市前入左二百萬股牛證，大約六千三蚊，而家道期跌緊，如果全晚都係咁，可以預期明天一開市就輸哂。我唔係第一次輸牛熊證，今次亦唔算輸得多，但係心情就好屈悶。因為昨日明明賺緊九千蚊，但係自己無停手，繼續買賣，搞到昨日倒輸四千。今日大市又跌，令到今日再輸多六千。如果明日再輸，就輸一萬多元。

其實自己整體應該係賺，不過咁樣陰啲輸唔係辦法。好想賺番番黎，但係就無運氣。唉，真係唔知點算好。

應唔應該企硬呢？

今日番工，本來好地地，但係大約十點十五分果陣，係球場位置發生左件事。有個人同同事嘈，最後發展到要鎖果個日去水記。而與此同時，有另一個人睇見我地咁做唔順眼，同我地發生罵戰。當然依個人都被鎖啦，但係依個唔係普通人，竟然縮骨功好勁，搞足我地成個更。

以上係今日發生事件既摘要。我係度諗，究竟點解會係球場嘈呢？其實如果係我，我應該唔會企到好硬，只要係一個時間之前離開，其實我都任佢地坐係球場。依個係我一黎到依度所見到既做法，我都唔會去改變，因為得我去改變係會好難做。其實因為一件小小既事，可以引發到好大既事。我相信我地每日都面對緊相同既事，大家都得過且過，無人想做第一個改正既人。

而今日所發生既事正正就係有人做左第一個改正既人，而且觸發到好多意想不同既事。唔知果個同事會唔會有唔舒服既感覺得呢？不過我覺得佢唔會有，因為佢有佢既執著，係佢覺得啱既標準下，可以會搞到其他人，但佢肯定唔會覺得有問題。其實我好怕拍依種人，好難同佢合作做事！

有一個寫BLOG既主題

其實我有諗過用李小龍FIGURE，影一系列打拳既相放上BLOG，主題係用FIGURE去教人打拳。我見遲下會出另一隻李小龍FIGURE，到時買左佢就可以影對打相。

要影相就要淘寶買一個影PRODUCT既打燈幕，咁樣就可以清楚咁展示啲動作。

我估計可以做到一定回響，因為網絡上好似未有人咁樣做。等到另一隻李小龍FIGURE就可以試下影打拳相。

最終都係買左破解版3DS

用左1800蚊買部破解版3DS，可以玩到漢化GAME。值唔值真係見人見志。果千八蚊係我上星期係期權果度賺番黎，一賺到即刻過數去銀行。叫做賺番黎既3DS，袋落袋先係自己。

其實屋企既遊戲機，有一部PS4已經好夠，IMAC都有隻GAME，不過仲未開始玩。依部3DS我原意係搭車同番公司玩。其實我之前買果部KINDLE都係諗住咁，但係到頭來都好小係公司搭車睇。

希望依部機我會KEEP住玩啦。其實買3DS有個好處係有女仔GAME，可以一齊玩咁。

買唔買new 3ds好呢？

最近玩緊隻手提電話遊戲，叫勇者鬥惡龍5。以前唔係太鐘意玩RPG遊戲，因為覺得太慢，要慢慢升級同埋要周圍行搵目的地。不過而家人太過左，想搵隻遊戲可以耐玩啲，慢慢磨，反而覺得RPG幾適合自己。

我知3DS有好多RPG遊戲，上網見到一套破解左既3DS，可以玩漢化遊戲，要1800元，我係度諗緊好唔好買。如果買左，我應該會係搭車同晚上瞓覺前玩，或者番通宵都係帶番去玩。

但其實自己都好多野可以做，特別係有好多書都未睇，又有好多片可以睇。而家仲考慮緊買唔買好。而家期權又無乜收獲。

買左新電腦 IMAC 27吋

舊既WINDOWS電腦已經壞壞地，經常性不能開機。因為太舊既關係，已經唔想去檢查邊一個部份壞左，要買咩零件去換。我知道如果要換一樣野，其實係要換埋其他野先配合到。

另外我現在的電腦只係用黎上網睇戲打下字，已經好少打機，所以我寧願要一個大MON都唔使特別勁既電腦，當然越勁係越遲OUTDATE。

賺錢

究竟可以點樣係工餘時間賺錢呢? 暫列方法如下:
-炒股票
-買車位收租
-買樓收租
-寫blog賺錢
-拍youtube片賺錢
-炒玩具
-開網上店